Inspektorati i Punës në Ferizaj ka zhvilluar një aksionin që ka zgjatur tri ditë. Përmes këtij aksioni ka kontrolluar rregullat e sigurisë në punë, pushimet, pajisjen e objekteve me mjete mbrojtëse dhe të gjitha rregullat ligjore, përfshirë pushimet dhe disiplinimin e stafit.
Së bashku me forcat e Policisë së Kosovës, aksioni ka filluar rreth orës 21:00, ndërsa caku i inspektimit kanë qenë disa kafiteri.
Në rastin e parë biznesi nuk është kujdesur për respektimin e ligjit. Nuk ka poseduar dëshmi se punëtorët marrin pagë, shfrytëzojnë pushimet. Gjithashtu, në lokal ka munguar edhe vlerësimi i rrezikut.
Në biznesin e dytë, në lokal nuk janë gjetur dëshmi për paga të punëtorëve. Sipas deklaratave të para, pagat punëtorëve iu jepen në dorë. Gjithashtu, punëdhënësi nuk ka pasur dëshmi që punëtorët kanë shfrytëzuar pushimet, raporton Kallxo.
Të njëjtit biznes i është shqiptuar gjobë, për shkak se edhe më parë i ishte dhënë vërejtje.
Inspektimet kanë vazhduar edhe në lokale të tjera.
Në njërin nga bizneset është gjetur se biznesi nuk është i regjistruar në Administratën Tatimore të Kosovës.
Inspektorët kanë marrë të dhënat fillestare për të njoftuar Inspektoratin Komunal për të bërë mbylljen e atij lokali.