Deputeti nga radhët e Partisë Demokratike të Kosovës, Mergim Lushtaku, ka reaguar pas përleshjes së tij në kuvend me ministrat.
Në një postim në Facebook, Lushtaku ka sqaruar se reagimi i tij ishte kundër kriminelit serb, Milan Radojqiq dhe atyre që bashkëpunojnë me të.
“Reagimi im ishte kundër Radojqiqit dhe argatëve të tij”, ka shkruar Lushtaku.
Teksa kryeministri i Kosovës, Albin Kurti, po fliste në foltoren e Kuvendit të Kosovës, ai është sulmuar nga deputetët e opozitës.
Ky reagim i opozitës vjen pasi zëvendëskryeministri Besnik Bislimi ka larguar fotografinë e vendosur në foltore nga deputetja e PDK-së, Ganimete Musliu.
Kurti është spërkatur fillimisht me ujë nga deputeti i PDK-së, Mergim Lushtaku, e më pas filloi përleshja në mes të deputetëve të opozitës dhe atyre të pushtetit.
Në këtë kohë zëvendëskryeministri Besnik Bislimi e ka goditur deputetin Lushtaku me shishe të ujit në fytyrë, ku më pas deputetët e pushtetit e të opozitës janë përfshirë në rrahje.
Mbrojtja e afërt e kryeministrit Kurti ka ndërhyrë menjëherë.