Presidenti i Francës, Emmanuel Macron, do të takohet me përfaqësuesit e partive politike, për të gjetur zgjidhje pasi koalicioni i tij nuk arriti të fitonte shumicën në zgjedhjet parlamentare.
Takimet do të zhvillohen të martën dhe të mërkurën në Pallatin Elysee.
Qëllimi i bisedimeve do të jetë “ndërtimi i zgjidhjeve për t’i shërbyer francezëve” në një kohë kur nuk ka “shumicë alternative” për atë të aleancës qeverisëse të Macron, është shprehur një zyrtar presidencial.
Sipas tij, ftesat u janë dërguar partive, liderit të së majtës së fortë, Jean-Luc Melenchon dhe lideres së ekstremit të djathtë, Marine Le Pen.
“Si garant i institucioneve, presidenti i Republikës është i vendosur të veprojë në interes të francezëve”, shtoi zyrtari, shkruan REL.
Ndonëse Macron ende nuk e ka komentuar publikisht rezultatin e zgjedhjeve, analistët konsiderojnë se Macron mund të arrijë një marrëveshje me partinë tradicionale të krahut të djathë, Republikanët (LR).
Ata kanë konfirmuar se udhëheqësi i saj, Christian Jacob, e kishte pranuar ftesën për të marrë pjesë në takim.
Ndërkohë, nuk ka pasur asnjë koment të menjëhershëm nga palët e tjera.