Presidenti i Francës, Emmanuel Macron ka zhvilluar bisedime trepalëshe me homologun ukrainas, Volodymyr Zelensky dhe presidentin e zgjedhur të SHBA-së, Donald Trump në Paris të shtunën, në Pallatin Elysee, para se të nisen për në Ile de la Cite, ku do të ndodhi ceremonia e rihapjes së katedrales Notre-Dame.
Trump zhvilloi bisedime me Macron brenda Pallatit Elysée përpara ceremonisë së rihapjes së Katedrales Notre-Dame.
Ndërsa, Zelensky më pas mbërriti dhe u bashkua menjëherë me ta.
Treshja pozoi për një foto, por nuk bëri komente të mëtejshme publike përpara se të fillonin bisedimet.
Ndërkaq, në një deklaratë për media, Trump ka theksuar se ai dhe Macron kanë pasur “sukses të madh” gjatë mandatit të tij të parë në detyrë.
“Sigurisht, duket se bota është duke u çmendur pak, dhe ne do të diskutojmë për këtë”, ka shtuar Trump.
Ky udhëtim në Francë shënon kthimin e Trump në skenën ndërkombëtare, edhe pse ende një qytetar privat, ai po përgatitet të trajtojë disa nga krizat më të mëdha globale.