Ministri i Mbrojtjes, Ejup Maqedonci, ka takuar ish-komandantin e KFOR-it, gjeneralin Erhard Buhler, me të cilin kanë biseduar për situatën aktuale të sigurisë në vend.
Gjithashtu, siç ka shkruar Maqedonci në Facebook, në këtë takim kanë biseduar edhe për nivelin e zhvillimit në të cilin gjendet FSK-ja dhe synim për t’u anëtarësuar në NATO.
“Ishte kënaqësi që sot të pres në takim ish-komandantin e KFOR-it dhe të Komandës së Forcave të Përbashkëta Aleate në Brunssum të Holandës, Gjeneral Erhard Bühler. Diskutuam për situatën aktuale të sigurisë në vend, stadin e zhvillimit në të cilin gjendet Forca e Sigurisë së Kosovës, si dhe synimin e Kosovës për t’u anëtarësuar në NATO.
Falënderova gjeneralin Buhler për shërbimin e tij në Kosovë si komandant i KFOR-it, për kontributin e tij të paçmim në sigurinë e vendit për të cilën do të mbetet gjithmonë mik i Kosovës”, ka shkruar Maqedonci në Facebook.