Institucioni i Avokatit të Popullit në Maqedoninë e Veriut po përballet me një krizë serioze funksionale, pasi Kuvendi ende nuk ka zgjedhur pasardhësin e Avokatit të mëparshëm, Naser Ziberi, i cili doli në pension në muajin korrik.
Si pasojë e mungesës së një drejtuesi të ri, institucioni nuk është në gjendje të funksionojë normalisht.
Situata ka shkaktuar vonesa në pagesat e pagave për punonjësit, në shlyerjen e qirave dhe të shërbimeve të domosdoshme, ndërsa kreditorët kanë paralajmëruar mundësinë e ndërprerjes së tyre.
Punonjësit e institucionit kanë kërkuar ndërhyrje urgjente nga Kuvendi, duke theksuar se mosveprimi institucional po rrezikon seriozisht funksionimin e një mekanizmi kyç për mbrojtjen e të drejtave dhe lirive të qytetarëve.