Heshtja ka mbuluar shtëpinë brenda së cilës u krye njëra ndër vrasjet më mizore në Kosovë që nga paslufta.
7 muaj më parë, Urim Hyseni brenda këtyre mureve dyshohet se goditi mbi 20 herë nënën e tij me mjete të mprehta, duke i shkaktuar plagë vdekjeprurëse.
Pasditen e së premtes, pavarësisht se dyert e shtëpisë ishin të hapura, askush nga familjarët nuk ishte aty.
Të tronditur me rastin, vazhdojnë të jenë edhe fqinjët e familjes Hyseni, të cilët i thanë televizionit se gjendja e familjarëve edhe më tutje është e rëndë.
“Në mahallë jemi rritë bashkë, as na s’ia kemi çelë atë temë prej ditës që ka ndodhur rasti”.
Por, pjesëtarët e familjes Hyseni, paraditen e së premtes u paraqitën në Gjykatën Themelore të Pejës, për të ndjekur seancën fillestare kundër 31-vjeçarit, i cili ngarkohet me veprën penale “vrasje e rëndë”.
Mirëpo qasja në të u kufizua.
Pas përfundimit të seancës fjalëpak ishin të pranishmit në seancë.
Ajo u mbyll pas kërkesës së mbrojtëses së viktimave, e cila ka thënë se rasti ka të bëjë me dhunën në familje që ka përfunduar me vrasje, dhe se rastet e tilla janë çdo herë të mbyllura për publikun.
Pas seancës, e pyetur nëse i akuzuari e ka pranuar fajësinë, refuzoi të përgjigjej edhe prokuroria Sahide Gashi.
“Fakti që u përjashtua publiku prokuroria nuk ka të drejtë të prononcohet me atë.. më vjen keq por duhet me u kufizu”, ka thënë prokurorja, Sahide Gashi.
Për këtë para mediave nuk ka dashur të flasë as avokati i të akuzuarit, Asdren Mekaj.
Urim Hyseni akuzohet nga Prokuroria në Pejë, se më 14 prill të këtij viti ka vrarë nënën e tij, duke i shkaktuar plagë vdekjeprurëse në disa pjesë të trupit me mjete të mprehta.
Pas vrasjes, i njëjti, sipas Prokurorisë, trupin dhe kokën ia kishte ndarë në dy vende të ndryshme të shtëpisë, derisa më pas kishte sulmuar edhe babain e hallën e tij.