Komisioni Qendror i Zgjedhjeve (KQZ) sërish nuk e ka mbajtur mbledhjen e paralajmëruar për ditën e sotme.
Pas anulimit të mbledhjes të së martës, KQZ pritej që të mblidhej për të miratuar listën me qendra të votimit të cilat do të hapen për zgjedhjet e 23 prillit në veri të vendit.
Mirëpo, zëdhënësi i KQZ-së, Valmir Elezi, konfirmoi për Dukagjinin se nuk do të ketë mbledhje sot.
“Mbledhja e planifikuar për sot nuk do të mbahet. Jemi në përgatitje të materialeve për mbledhje, për mbajtjen e së cilës do t’ju njoftojmë me kohë”, ka thënë Elezi.
Zgjedhjet në katër komunat veriore do të mbahen më 23 prill të këtij viti.
Komisioni Qendror i Zgjedhjeve prej disa mbledhjeve ka shtyrë shqyrtimin e rekomandimeve të Këshillave Komunal Zgjedhor për qendrat e votimit në Mitrovicë të Veriut, Zubin Potok, Leposaviç dhe Zveçan.