Kuvendi i Republikës së Shqipërisë ka vendosur që më 12 tetor ta mbajë seancën e posaçme për Kosovën, për miratimin e një rezolute rreth situatës në Kosovë.
Seanca nga takimi i Konferencës së Kryetarëve u shoqërua me debate, ku kreu i grupit parlamentar të PD-së, Gazmend Bardhi, kërkoi seancë urgjente për mocion me debat dhe miratimin e rezolutës për situatën në Kosovë.
“Është urgjente që të zhvillojmë mocionin me debat. Nuk mundet ne të jemi të fundit. PE e ka zhvilluar”, ka thënë deputeti shqiptar, Bardhi.
Nga ana tjetër, PS-ja propozoi që rezoluta dhe mocioni me debat të mos jenë urgjente.
“Propozoj që debati bashkë me rezolutën të bëhen më 19 Tetor”, ka thënë fillimisht kryetarja e Kuvendit, Lindita Nikolla.
Ndërkohë që kreu i grupit të PS-së, Bledi Çuçi, u shpreh se ” Nuk mund të nxitojmë. Çdo rezolutë duhet të mbajë ndër mend pozicionin e Shqipërisë që ka në NATO dhe në çdo organizëm. Data mund të rishikohet që të jetë më shpejt, ndoshta të enjten e seancës. Por të hënën nuk mund ta bëjmë dot”.
Tabaku ka theksuar se “shembullin për rezolutë të përbashkët na e dha Kosova. Nuk e kemi kompleks. Rëndësi ka vullneti, mund ta arrimë edhe të hënën”, raporton Euronews.
Pas diskutimeve u vendos që seanca e posaçme të mbahet më 12 tetor dhe debati për Kosovën të zgjasë 5 orë në parlamentin e Republikës së Shqipërisë.
Gjithashtu, palët kanë rënë dakord të dalin me një rezolutë të përbashkët për dënimin e sulmit të 24 shtatorit në Kosovë.