Ministri i Mbrojtjes, Armend Mehaj, gjatë raportimit të tij në Komisionin për Çështje të Sigurisë dhe të Mbrojtjes, ka folur për pasqyrën në lidhje me realizimin e buxhetit.
Ai ka theksuar se buxheti i Ministrisë së Mbrojtjes deri më tani është realizuar 85 për qind.
“Nga buxheti i shpenzuar rreth 53 për qind janë shpenzuar për sisteme të armatimit dhe artikujt të mbrojtjes, por deri në fund të vitit vlerësojmë se realizimi i buxhetit do të jetë mbi 90 për qind”, është shprehur Mehaj.
Mehaj ka treguar se gjatë këtij viti ka pasur blerje ushtarake, derisa ritheksoi se buxheti për vitin 2022 ka qenë 102 milionë euro, derisa për vitin 2023 është rritur në 123 milionë euro.
“Po ka pasur blerje, jemi edhe në blerje e sipër për avancimin e nevojave ushtarake në mbrojtje të territorit të Kosovës”, ka thënë ai.
Ai ka treguar se është plani përkatës se çfarë nevoja duhet t’i ketë ushtria e Kosovës për mbrojtje të territorit.
Po ashtu, Mehaj ka thënë se gjatë vitit 2022, Ministria e Mbrojtjes ka pranuar donacione nga shtete partnere si SHBA, Turqia, Mbretëria e Bashkuar, Norvegjia e të tjera.
“Vlera e donacioneve të pranuara deri më tani është afër 6.3 milionë euro, prej tyre, pasuri kapitale janë 6.2 milionë, ndërsa mallra dhe shpërblime janë afër 151 mijë”, tregoi ai.
Si sifdë gjatë këtij viti, ai ka përmendur inflacionin e përgjithshëm postpandemik.
“Mund ta përmendi inflacionin e përgjithshëm postpandemik që ka prekur jo vetëm shtetin tonë, por edhe më gjerë, duke vështirësuar lidhjen e kontratave me operatorë ekonomikë, por me trenin e tashëm të stabilizmin ekonomik vlerësojmë se viti tjetër do të jetë më i suksesshëm në buxhet dhe përmbushjes së synimeve tona të përbashkëta”, shtoi Mehaj.