Ministri i Mbrojtjes, Armend Mehaj në takim me stafin e lartë të këtij dikasteri ka njoftuar zyrtarët civilë, këshilltarët bilateralë dhe të Ekipit Këshillues dhe Ndërlidhës të NATO-s (NALT) rreth operacionit të kërkim-shpëtimit në Turqi se tani për tani FSK-ja po operon me kontigjentin e specializuar në provincën Hatay që është dhe rajoni më i prekur nga tërmeti shkatërrimtar.
“Ushtarakët tanë profesionistë në fushën e kërkim-shpërtimit kanë shpëtuar deri më tani katër persona, ndërsa po vazhdojnë kërkimet për të mbijetuar të mundshëm në rrënojat e ndërtesave, së bashku me ekipet turke dhe forcat e shteteve të tjera”, ka shkruar Mehaj në Facebook.
Mehaj ka uruar që të ketë të tjerë të mbijetuar teksa pjesëtarët e FSK-së vazhdojnë me vullnet e përkushtim kërkimin dhe shpëtimin e tyre.
Ndryshe, tërmeti që ka goditur Turqinë dhe Sirinë të hënën e gjashtë shkurtit deri më tani ka lënë të vdekur mbi 37 mijë dhe pritet që ky numër të rritet.