Ministri i Mbrojtjes i Kosovës, Armend Mehaj, është shprehur i emocionuar nga prania e komandove të Forcave Tokësore të Shqipërisë, të cilët i ka quajtur vëllezër e motra.
“Sa e natyrshme aq edhe emocionale prania e vëllezërve e motrave tona në shërbim të sigurisë sonë”, ka thënë Mehaj.
“Kontigjenti i ri i komandove të Forcave Tokësore të Shqipërisë i bashkohet trupave të forcave të NATO-s në misionin e KFOR-it në vendin tonë”.
Mehaj ka përfunduar duke thënë se është mirënjohës gjithmonë ndaj shërbimit të ushtarëve të Shqipërisë në Kosovë. Është e “shenjtë e fisnike”, ka shtuar ai.
“Një tjetër kontigjent me 30 efektivë nga Forca Tokësore dhe Batalioni Komando nga Regjmenti i Operacioneve Speciale do t’i bashkohet misionit të KFOR-it në Pejë, në krah të aleatëve italianë e kroatë”, ka shkruar ministri i mbrojtjes i Shqipërisë, Niko Peleshi në Facebook.
Ai ka theksuar se ky është një moment i veçantë, pasi Shqipëria është duke dhënë mbështetjen e pakursyer ndaj Kosovës duke i nisur 30 ushtarë për t’i shërbyer sigurisë dhe paqes.
Shqipëria dërgon një kontigjent tjetër prej 30 ushtarësh në Kosovë