Ministri i Mbrojtjes, Armend Mehaj ka thënë se në çdo sukses të Ministrisë së Mbrojtjes meritor janë edhe përfaqësuesit e shteteve partnere “të cilët kanë kontribuar në çdo hap të zhvillimit dhe avancimit të Ministrisë dhe Ushtrisë së Republikës së Kosovës”.
Ministri Mehaj ka njoftuar se në shenjë falenderimi dhe mirënjohje krahas punonjësve të ministrisë, të premten e 16 dhjetorit kishte pritur në një organizim të veçantë, ambasadorë, atashe të mbrojtjes, oficerë të NALT-it, ish-ministra e ish-komandant e deputetë.
Mehaj ka theksuar se me personat që u takua ndajnë vlera dhe një vizion të përbashkët për të kontribuar në ruajtjen e paqes dhe stabilitetit të vendit por edhe për të realizuar synimin e tyre për anëtarësim në NATO.
“Qofshin gjithmonë përpjekjet tona konstruktive të orientuara drejt mbledhjes së forcave të njerëzimit për të kultivuar atmosferë mirëkuptimi dhe bashkëpunimi të ngushtë ndërmjet kombeve, në mbështetje të vlerave demokratike dhe të paqes kudo dhe kurdoherë”, ka theksuar ministri Mehaj.