Ministri i Mbrojtjes i Kosovës, Armend Mehaj, ka reaguar pas tërmetit të fuqishëm vdekjeprurës që ka goditur Turqinë dhe Sirinë të hënën, duke i shprehur gatishmërinë e plotë homologut të tij turk, Hulusi Akar që të ofrohet ndihmë me të gjitha kapacitet profesionale të FSK-së për reagim, kërkim-shpëtim dhe rimëkëmbje në zonat e prekura.
Përmes një postimi në Facebook, ministri Mehaj ka uruar që numri i viktimave dhe dëmeve të jetë sa më i vogël.
“Urojmë që numri i viktimave dhe dëmeve të jetë sa më i vogël, ndërsa familjeve të cilët kanë humbur më të dashurit e tyre u shprehim ngushëllimet tona më të sinqerta. Me vullnet dhe forcë lutemi që ta kaloni këtë sfidë të rëndë”, ka shkruar Mehaj.
Tutje, Mehaj ka thënë se në këto çaste të vështira për presidentin, Recep Tayyip Erdoğan dhe popullin turk lutjet janë me ta.
“Në këto çaste të vështira për presidentin Recep Tayyip Erdoğan dhe popullin turk lutjet tona janë me ta”.
Ndryshe, të hënën e 6 shkurtit, një tërmet i fuqishëm ka goditur një zonë të gjerë në Turqinë juglindore, pranë kufirit me Sirinë, duke vrarë më shumë se 300 njerëz dhe duke bllokuar shumë të tjerë.
Siç raportojnë mediat ndërkombëtare, deri më tash numri i përgjithshëm i viktimave në Turqi dhe Siri ka shkuar mbi 500.