Të enjten, kryesuesi i bordit të KOSTT-it, Jeton Mehmeti, gjatë raportimit në Komisionin Hetimor Parlamentar për energji ka konfirmuar se Kosova ka tregtuar energji elektrike me kompaninë GEN, e cila vepron me zyrë edhe në Beograd, raporton KP.
Mehmeti ka përmendur emrat e kompanive që Kosova ka tregtuar energji elektrike në periudhën e fundit, i cili ka thënë se emrat e tregtarëve janë: GEN, Tirana shpk dhe KESh.
Megjithatë edhe pas insistimit të deputetit të PDK-së, Ferat Shala, i cili ka pyetur për shtetet me të cilat Kosova tregton rrymë, Mehmeti nuk pranoi të përmendë emrat e shteteve.
Ndër të tjera, Mehmeti gjatë intervistimit ka folur edhe për devijimet në sistemin energjetik dhe për humbjet në sistem.
Ndryshe, më 17 gusht, zëdhënësi i Prokurorisë Speciale të Kosovës, Ekrem Lutfiu, kishte njoftuar se Prokuroria Themelore në Prishtinë ka pranuar nga Agjencia Kundër Korrupsionit kallëzim penal ndaj ambasadorit të Kosovës në Kroaci, Martin Berishaj.
Sipas mediave sllovene, Berishaj ishte bërë pjesë e një skeme, ku parat e dërguara nga një kompani serbe, transferoheshin te një kompani tjetër malazeze, pronar i së cilës ishte ambasadori i Kosovës, Martin Berishaj.
Më pas, sipas mediumit slloven, thuhej se ato mjete financiare i dërgoheshin një politikani slloven para se të përfundonin në një kompani tjetër në Itali.