Këtë të enjte kanë paralajmëruar protestë minatorët e Ndërmarrjes Publike Qendrore “Trepça” para Qeverisë së Kosovës.
Sindikata e Pavarur e Minatorëve të Trepçës ka thënë se protesta do të mbahet për shprehjen e pakënaqësive dhe për mosrealizimin e pagave.
“Marshimi do të fillojë nga sheshi Zahir Pajaziti – Prishtinë, deri pranë objektit të Qeverisë së Republikës së Kosovës. Kjo protestë reflekton kërkesën e vetme të minatorëve, e që është pagesa e pagave të papaguar për gati tre muaj”, thuhet në njoftim. “Ta dini që situata e minatorëve është rënduar tej mase, mosekzekutimi i pagave i ka dërguar minatorët në një situatë krize për ekzistencë, andaj si mjet për të kërkuar bukën e gojës për vete dhe familjen e tyre ka mbetur të protestuarit si mjet ligjor dhe demokratik”, thuhet në njoftim.
Tash e më shumë se dy muaj minatorët e ndërmarrjes publike Trepça nuk i kanë marrë pagat.