Sot (e enjte) po vazhdon dita e tretë e grevës së urisë nga minatorët në minierën e Trepçës.
Gazetarja e RTV Dukagjinit, Vlora Selimi, e cila po e përcjell nga afër këtë grevë, tha se minatorët e Trepçës të cilët po qëndrojnë në grevë tash e tri ditë, janë vizituar të enjten nga ish-kryetari i komunës së Mitrovicës, Agim Bahtiri dhe nga Avokati i popullit, Naim Qelaj.
Po ashtu, minatorët grevistë janë vizituar edhe nga Sindikata e Minatorëve të Shqipërisë.
Sot është dita e tretë e grevës së urisë, ata jo vetëm se janë duke mbajtur grevë por kanë refuzuar edhe ushqimin dhe pijet tash e dy ditë.
Ndryshe, Fevzi Ademi nga Sindikata e Minatorëve gjatë ditës së djeshme( të mërkurën) ka deklaruar se greva e urisë e minatorëve të Trepçës do të vazhdojë deri në plotësimin e tri kërkesave të tyre.
Ai, në emisionin “Five” në RTV Dukagjini, tha se kërkesa e parë është që të mos ketë më vonesa në pagesa, të shkarkohet menaxheri i ndërmarrjes Trepça dhe pika e tretë sigurimi shëndetësor dhe plotësimi i kushteve për punë.
“Është ekzekutuar pjesa e mbetur e pagës sot, mirëpo aty me kërkesat që kanë dalë nga grevistët minatorë, janë tri kërkesa. Pagat të mos ketë vonesa në vazhdim… pika e dytë lirimi nga detyra i menaxherit të ndërmarrjes dhe pika e tretë sigurimi shëndetësor dhe plotësimi i kushteve”, tha ai.
Ademi më tej është shprehur se situata shëndetësore e minatorëve është duke u rënduar.
“Kemi hyrë në orën e 38 të grevës, gjendja po shkon duke u rënduar, i kemi pasur dy raste të alivanosjes që janë dërguar në QKMF apo emergjencë në Mitrovicë. Mbi 70 minatorë kanë kërkuar mjekësore, kanë pasur kokë-dhimbje e skuqje të syve… Ata po qëndrojnë në horizotnin e 10-të. Minatorët janë të vendosur që grevën ta vazhdojnë deri në realizimin e kërkesave të tyre, të cilat janë minimale”, ka thënë Ademi.