Deputetja e Partisë Demokratike të Kosovës (PDK), Vlora Çitaku, ka folur para mediave pas dështimit të 35-të me radhë për konstituimin e Kuvendit të Kosovës, duke e akuzuar Lëvizjen Vetëvendosje dhe liderin e saj, Albin Kurti, për bllokadën institucionale që, sipas saj, po e çon vendin drejt një kolapsi të përgjithshëm.
“Për Albin Kurtin pushteti është më i rëndësishëm se shteti, egoja është më e madhe se Kosova. Ambicia është më e madhe dhe më e rëndësishme se demokracia”, deklaroi Çitaku, duke vënë në pah se interesat personale po vendosen mbi interesin e shtetit.
Ajo kërkoi reflektim urgjent nga Vetëvendosje dhe paralajmëroi për pasojat serioze që po i shkaktohen vendit si pasojë e kësaj situate.
“Kjo situatë duhet të marrë fund dhe presim nga VV-ja që të reflektojë. Kosova është buzë kolapsit, çdo ditë kemi lajme për dëm të pariparueshëm që kjo situatë po i shkakton ekonomisë. Dje pamë lajme të frikshme për krizë buzë kolapsit në sektorin e energjisë. Mjaft është mjaft”, u shpreh Çitaku.