Kushtet e rënda të motit po pengojnë përpjekjet për të shpëtuar të bllokuarit nën rrënoja në Turqi dhe Siri dhe po rrezikojnë mijëra njerëz, shtëpitë e të cilëve u dëmtuan nga tërmeti i së hënës.
“Mijëra shtëpi janë shkatërruar, duke zhvendosur familjet dhe duke i ekspozuar ato në një kohë të vitit kur temperaturat bien rregullisht nën zero dhe bora dhe shiu i ngrirë janë të zakonshme”, tha zëdhënësi i UNICEF-it, James Elder në një konferencë shtypi në Gjenevë të martën.
“Familjet e zhvendosura në veriperëndim të Sirisë dhe familjet e refugjatëve sirianë që jetojnë në Turqi në vendbanimet informale janë ndër më të cenueshmet, pasi temperaturat gjatë natës vazhdojnë të bien nën zero gradë Celsius (32 gradë Fahrenheit)”, tha ai.
Temperaturat tashmë janë të ulëta dhe deri të mërkurën pritet të bien disa gradë nën zero.
Një zonë me presion të ulët aktualisht qëndron mbi Turqinë dhe Sirinë. Ndërsa kjo largohet, kjo do të sjellë “ajër dukshëm më të ftohtë” nga Turqia qendrore, sipas meteorologes së lartë të CNN, Britley Ritz.
Parashikohet të jetë -4 gradë Celsius në Gaziantep dhe -2 gradë në Aleppo mëngjesin e së mërkurës. Të enjten kjo parashikohet të bjerë më tej, në -6 gradë në Gaziantep dhe -4 gradë në Aleppo.
Kushtet e kanë bërë tashmë sfiduese që ekipet e ndihmës të arrijnë në zonën e prekur, tha ministri turk i Shëndetësisë Fahrettin Koca, duke shtuar se helikopterët nuk mund të ngriheshin të hënën për shkak të motit të keq.