Ministria e Punëve të Jashtme dhe Diasporës së Kosovës është deklaruar në lidhje me raportimin nga mediat norvegjeze se shqiptari nga Peja, Artan Zymberi, me nënshtetësi norvegjeze, ka vdekur në Burgun e “Sremska Mitrovicës” në Serbi.
MPJD ka konfirmuar për mediat se nga Zyra Ndërlidhëse e Serbisë në Kosovë u është komunikuar se nuk kanë arritur të marrin ndonjë informatë që mund ta konfirmojnë rastin.
Po ashtu, thuhet se mediat serbe nuk kanë raportuar për vdekjen e Artan Zymberaj.
“Me të marrë njoftimin për rastin e Artan Zymberajt, të premten në mëngjes, më 2 dhjetor 2022, Misioni i Posaçëm i Republikës së Kosovës në Beograd ka kontaktuar me autoritetet serbe, respektivisht me Zyrën Ndërlidhëse të Serbisë në Kosovë, për ta konfirmuar rastin. Nga Zyra Ndërlidhëse e Serbisë në Kosovë na është komunikuar se janë duke u përpjekur të marrin të dhënat e nevojshme nga autoritetet tjera serbe, por deri tani nuk na kanë ofruar ndonjë informatë, me të cilën, e konfirmojnë rastin”, thuhet në njoftim.
Tutje, në përgjigjen e tyre thuhet se Misioni i Posaçëm i Republikës së Kosovës në Beograd dhe ambasada e Republikës së Kosovës në Norvegji janë në kontakt dhe në dispozicion të familjes Zymberaj.