Ministria e Punëve të Jashtme dhe Diasporës (MPJD) e Kosovës ka bërë të ditur se nuk e ka miratuar kërkesën e drejtorit të së ashtuquajturës Zyrë për Kosovën në Qeverinë e Serbisë, Petar Petkoviq, për të hyrë në Kosovë për shkak të gjuhës që ka përdorur.
Sipas njoftimit, kjo mosdhënie e lejes për vizitë bazohet në respektimin e marrëveshjes për vizitat e ndërsjella.
“Petkoviq në vazhdimësi është paralajmëruar që gjuha e përdorur nga ai bie ndesh me marrëveshjen dhe që përdorimi i përsëritur i kësaj gjuhe rrjedhimisht çon në refuzimin e kërkesave për të hyrë në territorin e Republikës së Kosovës”, thuhet në njoftim.
Ministria shpreson që Petkoviq të tërhiqet nga deklaratat që rrënojnë rendin kushtetues të Kosovës.
“Qëndrimet e përsëritura të z. Petkoviq ndaj Republikës së Kosovës kanë karakter tejet dezinformues, propagandues dhe synojnë nxitje të urrejtjes”.
Ndryshe, të martën e 27 shtatorit, Drejtorit të së ashtuquajturës Zyra për Kosovën në Qeverinë e Serbisë, Petar Petkoviq, i është ndaluar vizita në Kosovë, sipas televizionit publik të Serbisë.
Në njoftimin e televizionit serb, thuhet se Petkoviq kishte planifikuar ta promovonte një shesh në Mitrovicën e Veriut.
Po ashtu, ai planifikonte ta vizitonte një djalë të ri serb në spitalin e Mitrovicës së Veriut.
Sipas njoftimit, Petkoviq kishte planifikuar të promovonte sheshin siç thuhet “për vëllezërit e pafajshëm Miliq në Mitrovicë” në Ditën e Kryqit, si dhe të vizitojë një të ri serb në spitalin e këtij qyteti.
Kjo nuk është hera e parë që Petar Petkoviqit i ndalohet hyrja në Kosovë, kjo është hera e nëntë që shteti i Kosovës e ndalon hyrjen e tij brenda territorit të shtetit.