Ministri i Financave, Hekuran Murati, e ka akuzuar Lidhjen Demokratike të Kosovës (LDK), se për shkak të tyre, qytetarët e Kosovës, do të vazhdojnë të paguajnë më shtrenjtë se që do duhej për vaj, miell e bukë.
Ai e theksoi dërgimin e Ligjit për çmime tavan, të cilin LDK e ka dërguar në Gjykatën Kushtetuese.
“Çmimi i furnizimit nga importi për vaj ushqimor ka rënë në 1.05 euro/litër. Çmimi i furnizimit nga importi për grurë ka rënë në 0.24 euro/kg. Ligjin për çmimet tavan, LDK e dërgoi në Gjykatë Kushtetuese. Prandaj qytetarët vazhdojnë të paguajnë më shtrenjtë se që do duhej për vaj, miell e bukë”, thuhet në reagimin e Muratit.
Në muajin tetor, ministrja e Industrisë, Ndërmarrësisë dhe Tregtisë (MINT), Rozeta Hajdari, kishte kërkuar që të miratohet ligji për masat e përkohshme të produkteve themelore.
Por, sipas LDK-së, ai ligj ishte anti-kushtetues dhe si të tillë e kishin dërguar në Gjykatën Kushtetuese.