Ministri i Financave, Hekuran Murati, në seancën e së enjtes në Kuvendin e Kosovës, ka thënë se me Projektligjin që mundëson tërheqjen e 30 për qind të mjeteve nga Trusti, opozita po synon që ta shkatërrojë sistemin pensional.
“Po thuhet është nismë e qytetarëve, qytetarët e kanë votuar edhe Qeverinë tonë me 50.2%, por çka po synohet këtu me këtë nismë, është shkatërrimin e sistemit pensional, sepse kjo tanimë është thënë nga deputetë të opozitës, synimi është që të merren këto 30%, pastaj edhe 30% të tjera dhe të shkatërrohet sistemi e të kalojmë në sistemin ku gjenerata kontribuon për gjeneratë”, ka thënë Murati.
Sipas tij, gjenerata aktuale që ka kontribuuar duhet të vazhdojë të kontribuojë edhe për gjeneratat e tjera, të paguajnë dyfish,” për shkak se dikush dëshiron ta shkatërrojë sistemin”.
“Ne e kemi pasur një sistem pensional, të cilin na e ka shkatërruar Serbia dhe i ka marrë fondet, tash edhe opozita po, do ta shkatërrojë këtë sistem që mezi e kemi ndërtuar, ky është synimi”, ka vijuar Murati.
Ndër të tjera, ai ka thënë se kjo nismë nuk mund të arsyetohet me kërkesat e qytetarëve.