Ministri në detyrë i Financave, Hekuran Murati, ka paralajmëruar se Kosova mund të humbasë 90 milionë euro nga Banka Botërore nëse marrëveshja nuk ratifikohet deri në shtator.
Ai ka bërë të ditur se kjo shumë me kamatë 0% është alokuar që nga maji i vitit të kaluar, por Kuvendi nuk ka arritur ta miratojë për shkak se sipas tij, partitë opozitare gjatë legjislaturës së kaluar kishin refuzuar të votonin ratifikimin.
“Ndërsa tash po e pamundësojnë edhe konstituimin e legjislaturës së re duke mos marrë fare pjesë në votim, duke prolonguar kështu ratifikimin e kësaj marrëveshjeje”, ka shtuar Murati.
Ai ka theksuar se mjetet mund t’i jepen një shteti tjetër nëse vazhdon bllokada politike.
Murati u ka bërë thirrje partive opozitare të reflektojnë dhe të lejojnë konstituimin e Kuvendit.
“Prandaj është jetike që opozita të reflektojë dhe të mundësojë konstituimin e Kuvendit, e pastaj edhe të votojë këtë marrëveshje. Inatet politike nuk do të duhej t’i kushtonin shtetit tonë”, ka shkruar ai në Facebook.