Deputetja e PDK-së, Ganimete Musliu, e ka kritikuar ashpër presidenten Vjosa Osmani, sepse sipas saj, shefja e shtetit po i përdor fëmijët e saj për të shmangur përgjegjësinë publike.
Në profilin e saj në “Facebook”, Musliu ka shkruar se kjo mënyrë e viktimizimit është shqetësuese.
“Është shqetësuese, por tashmë jo e papritur, mënyra si përdoret emocioni dhe pozita familjare për të shmangur përgjegjësinë publike. Në deklaratën e fundit të Presidentja e vendit , përmes një gjuhe dramatike dhe emocionalisht të ngarkuar, përpiqet të heshtë kritikën dhe interesin legjitim publik duke e quajtur “përndjekje” çdo pasqyrim mediatik që nuk i përshtatet narrativës së saj”, ka shkruar ajo, duke dhënë detaje tjera.
“Të jemi të qartë: askush nuk ka të drejtë të rrezikojë sigurinë e fëmijëve, e aq më pak të miturve. Por po ashtu, askush nuk ka të drejtë ta përdorë figurën e fëmijës si mburojë nga kritika publike kur ajo ka të bëjë me vendime, veprime apo sjellje të një figure të lartë shtetërore. Në këtë rast, Presidentja ka zgjedhur të largojë fëmijët nga një shkollë publike për shkak të kushteve të rënda infrastrukturore, një veprim që, për një qytetar të zakonshëm, është përditshmëri, por për një Presidente, duhet të jetë alarm për veprim institucional, jo fshehje personale”, ka shkruar Musliu.