Deputeti i Partisë Demokratike të Kosovës, Arben Mustafa, ka akuzuar Qeverinë Kurti për neglizhencë në menaxhimin e krizës ekonomike dhe rritjen e çmimeve, duke theksuar se rritja e çmimit të naftës po ndikon drejtpërdrejtë në shtrenjtimin e produkteve dhe shërbimeve për qytetarët.
Gjatë një konference për media, Mustafa tha se prioriteti i qeverisë është vetëm mbledhja e taksave me çdo kusht, të cilat ruhen për përdorim si subvencione gjatë fushatave politike.
“Sot, për çdo litër naftë, shteti merr rreth 60 centë taksa: 36 centë akcizë dhe 24 centë TVSH. Pra, kur një qytetar furnizohet me naftë, në çmimin prej 1.80 euro për litër, nuk paguan vetëm çmimin e naftës, por i paguan edhe shtetit 60 centë taksa. Kjo është një barrë që duhet të lehtësohet në këtë kohë krize. Heqja dorë përkohësisht nga këto taksa, në tërësi apo edhe pjesërisht, do të nënkuptonte një zbritje të menjëhershme të çmimit të naftës dhe frenim të efektit zingjiror të rritjes së çmimeve”, shtoi ai.
Mustafa theksoi se pas rritjes së çmimeve në vitin 2022, Kosova nuk mund të përballojë edhe një valë tjetër të varfërimit të qytetarëve të saj.
“Rritja e çmimit të naftës nuk prek vetëm ata që furnizohen në pompë. Ajo rritë shpenzimet e transportit, të prodhimit dhe, rrjedhimisht, çmimet e të gjitha produkteve që konsumojmë. Në prag të sezonit të bujqësisë, kjo rritje godet drejtpërdrejt bujqit tanë, duke i detyruar të prodhojnë me shpenzime më të mëdha dhe, rrjedhimisht, ti shtrenjtojnë produktet e tyre”, theksoi deputeti i PDK-së.
PDK po kërkon ulje të menjëhershme të taksave për derivatet e naftës, në mënyrë që çmimi të reflektojë realitetin ekonomik të qytetarëve dhe jo vetëm interesin fiskal të shtetit.
“Masa konkrete dhe të drejtpërdrejta për mbrojtjen e bujqve dhe prodhuesve vendorë, përfshirë subvencione shtesë dhe mbështetje për inputet bazë në këtë sezon kritik. Një plan emergjent, të qartë dhe të matshëm, për përballimin e rritjes së çmimeve, që garanton stabilitet për familjet dhe bizneset. Pra, një plan emergjent anti-inflacion, me objektiva konkrete për stabilizimin e çmimeve dhe masa të koordinuara mes ministrive. Kontroll dhe transparencë në treg për t’i parandaluar abuzimet, me inspektime të shtuara ndaj çmimeve, monitorim të zinxhirit të furnizimit, penalizim të marrëveshjeve të fshehta dhe rritjeve artificiale, sepse, shumë rritje çmimesh nuk janë vetëm nga tregu, por edhe nga abuzimet”, bëri thirrje Mustafa.
Ai kërkoi nga Qeveria që energjinë, të cilën po e shpenzon për të krijuar dhe apo thelluar kriza politike, ta përqendrojë në mbështetjen konkrete të qytetarëve dhe ekonomisë së vendit.