Ministrja e Arsimit, Arbërie Nagavci, ka bërë të ditur se është finalizuar Projektligji për Arsimin e lartë, që sipas saj do të garantojë cilësi dhe autonomi universitare.
Nagavci ka treguar se të hënën projektligji do të “publikohet në Platformën e Diskutimeve Publike dhe do të jetë i hapur për komente”.
E para e arsimit, i ka listuar disa nga risitë që sipas saj i sjell projektligji:
“Kritere të qarta për themelimin e institucioneve të arsimit të lartë.
Përcaktimi i obligimeve dhe detyrave të strukturës qeverisëse të institucioneve publike të arsimit të lartë.
Përcaktimi i standardeve minimale dhe kushteve për emërime akademike.
Financimi i institucioneve publike në bazë të kontratave të performancës.
Vendosja e mekanizmave për sigurimin e integritetit akademik: Komiteti etik në nivelin qendror, këshilla të etikës në çdo institucion të arsimit të lartë.
Verifikimi i titujve akademikë të fituar para hyrjes në fuqi të Ligjit.
Ky projektligj të hënën do të publikohet në Platformën e Diskutimeve Publike dhe do të jetë i hapur për komente”.
Ministrja Nagavci u ka bërë thirrje qytetarëve që t’i dërgojnë komentet e tyre në lidhje me këtë projektligj.