Zëdhënësja kryesore për Aleancën e Atlantikut të Veriut, Oana Lungescu, ka deklaruar se NATO e dënon fuqishëm sulmin me shok-bombë ndaj një patrulle të EULEX-it.
“Ne bashkohemi me Aleatët e NATO-s dhe BE-së për të dënuar fuqishëm sulmin me granatë trullosëse në një patrullë të EULEX-it mbrëmë. Çdo sulm i tillë është i papranueshëm dhe përgjegjësit duhet të mbajnë përgjegjësi”, ka shkruar ajo në rrjetin social Twitter.
Po ashtu, ajo ka theksuar se misioni i NATO-s dhe KFOR-it, mbetet jashtëzakonisht vigjilent dhe plotësisht i aftë për ta kryer atë mandatin e OKB-së në Kosovë.
“U bëjmë thirrje të gjitha palëve që të shmangin veprimet dhe retorikën provokuese dhe të kontribuojnë për qetësinë dhe stabilitetin”, ka shkruar tutje ajo.
Ndërsa, pasi EULEX-i bëri njoftimin se iu është sulmuar një patrullë, ka thënë se nuk ka të lënduar dhe nuk janë shkaktuar dëme materiale.
“Asnjë zyrtar i Njësisë Policore të Specializuar të EULEX-it nuk është lënduar dhe nuk janë shkaktuar dëme materiale”, thuhet në njoftimin e tyre, raporton Portali Dukagjini.
Po ashtu, sipas njoftimit, EULEX-i do të vazhdojë të punojë me vendosmëri për ta mbështetur stabilitetin e Kosovës, në kuadër të mandatit që e ka, si dhe të kontribuojë për sigurinë e popullatës nga të gjitha komunitetet.