Policia e Kosovës ka njoftuar se zyrtarët policorë nga Task-Forca e Drejtorisë Rajonale të Policisë Kufitare-Lindje ka intensifikuar aktivitetet në teren dhe bashkëpunimin me qytetarë.
Policia njofton që pasi është pranuar informatë nga fshati Debelldeh i komunës së Vitisë se lëvizin disa automjete, dyshohet të ngarkuara me mallra të kontrabanduar është arritur të ndalohet automjeti pa tabela, i cili ishte i ngarkuar me mall të kontrabanduar. Automjetin e ndaluar ishte duke e vozitur i dyshuari mashkull kosovar I.S., 35-vjeçar.
“Gjatë kontrollit, në automjet kishte të ngarkuar: tekstil, klima, pjesë të automjeteve, pjesë të ndryshme dekorative për automjete dhe shtëpi, medikamente natyrale, lëndë e parë për shisha, fletore dhe libra të ndryshme, telefona Iphone 13 etj., të cilat ishin të kontrabanduar nga Republika e Maqedonisë Veriore”, njofton Policia e Kosovës.
Mes tjerash, policia ka thënë se pas njoftimit të prokurorit dhe në bashkëpunim me Doganën e Kosovës dhe ATK-në është kontrolluar një lokacion ku janë konfiskuar edhe një sasi e konsiderueshme e tekstilit, produkte të ndryshme higjienike dhe një sasi e konsiderueshme e mishit të terur.
Po ashtu, Policia e Kosovës ka njoftuar se rasti është duke u trajtuar nga njësitë përkatëse policore dhe me aktvendim të prokurorit është caktuar masa e ndalimit policor për 48 orë, ndërsa malli i kontrabanduar është dërguar në terminalin doganor.