Rusia ka dhënë fshehurazi mbi 300 milionë dollarë për parti politike dhe kandidatë në dhjetëra vende, që nga viti 2014, sipas një zyrtari të lartë amerikan. Ai ka thënë gjithashtu se presidenti i Rusisë, Vladimir Putin, është angazhuar në financimin e fshehtë politik për partitë politike dhe kandidatët në mbarë botën.
Në partitë e financuara nga Rusia, sipas këtij zyrtari amerikan, hynte edhe Partia Demokratike në Shqipëri.
“Në Shqipëri, Rusia i dha rreth gjysmë milioni dollarë Partisë Demokratike në 2017 përmes kompanive fantazëm”, ka thënë një burimi i qeverisë amerikane për Zërin e Amerikës, transmeton Portali Dukagjini.
Më tej, zyrtari që ka folur për mediumin ka treguar se Komuniteti Amerikan i Zbulimit, në bazë të analizimit të financimeve nga Rusia, “në mbi 24 vende gjatë viteve të fundit në një përpjekje për të manipuluar demokracitë nga brenda”.
Sipas një burimi me njohuri mbi raportin amerikan të zbulimit, Shqipëria është një nga këto vende.
Burimi nuk dha hollësi të mëtejshme për rastin e Shqipërisë. Por viti 2017, emri i Partisë Demokratike dhe shifra e përmendur prej 500 mijë dollarësh përkojnë me hetimet që janë hapur në Shqipëri në atë kohë ndaj PD-së bazuar në deklarimet që firma lobuese amerikane ‘Muzin Capitol Partners’ ka raportuar se ka marrë nga PD-ja.
Firma lobuese amerikane kishte deklaruar në vitin 2018 në Departamentin Amerikan të Drejtësisë, se ajo kishte marrë gjithsej tri pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017.