Prezenca e institucioneve paralele serbe është e dëmshme pasi ndan njerëzit; disa që pasurohen në mënyrë enorme e disa të tjerë që jetojnë buzë ekzistencës.
Kështu ka deklaruar për RTK-në, nënkryetarja e Komunës së Leposaviqit, Marina Bogojeviq, teksa thekson si problematikë integrimin e plotë të serbëve përderisa ata vazhdojnë të marrin paga e pensione nga Serbia.
“Prezenca përmes institucioneve paralele serbe është e dëmshme, duke i ndarë njerëzit, disa në njërën anë të cilët në mënyrë enorme janë pasuruar dhe në anën tjetër përqindjen e njerëzve që kanë jetuar buzë ekzistencës. Po e shoh se tash me ardhjen e institucioneve të reja komunës, e kemi kuptuar që ka qenë një numër i njerëzve të cilët mezi kanë mbijetuar. Çdo përzierje e institucioneve paralele të autoriteteve serbe këtu, do të jetë e dëmshme për këtë popull”, ka deklaruar ajo.
Më tej, ajo ka thënë se banorëve serbë u duhet vetëm kuadri legjislativ përmes Asociacionit, duke theksuar se ndërhyrjet e strukturave paralele deri tash kanë shkaktuar konfuzion të madh te populli.
“Sa i përket Asociacionit, për mua dhe qytetarët serbë që jetojnë këtu, mundësia e vetme e zgjidhjes është koordinimi direkt me Prishtinën, zgjidhjet të bëhen nga Prishtina, sepse ne nuk shohim më mbrapa, dhe në dy kryetarë. E shohim vetëm gjendjen reale e cila është tash në terren. Gjendja jonë reale është që të merremi me veten përmes punësimit të rinisë, siç po e bëjmë përmes komunës, kemi konkurse të reja të hapura. Kështu që rinia në tërë territorin e veriut nuk ka shkuar për shkak të politikës së Kosovës, por për shkak të politikës së Serbisë”, ka thënë Bogojeviq.
Sipas nënkryetares së Leposaviqit, për banorët e komunitetit serb në veri të vendit duhet vetëm një zgjidhje; punësim e jetë më e mirë në hapësirat në të cilat jetojnë.