Zëdhënësi i Qeverisë së Kosovës, Arlind Manxhuka, ka reaguar pas deklaratave të ministrit për Komunitete dhe Kthim, Nenad Rashiq, lidhur me vendimin për regjistrimin e 24 hektarëve tokë në emër të Manastirit të Deçanit.
Manxhuka ka theksuar se zbatimi i aktgjykimit të Gjykata Kushtetuese e Kosovës është bërë vetëm në funksion të procesit të anëtarësimit të Kosovës në Këshill të Evropës.
Sipas tij, ajo që ka “ngatërruar” ministri Rashiq është pranimi i kërkesës së tij për vizitën e Porfirije, Patriarkut të Kishës Ortodokse Serbe, në Kosovë për Krishtlindjet Ortodokse të vitit 2023.
Manxhuka ka thënë se kjo çështje nuk ka lidhje me vendimin për zbatimin e aktgjykimit për tokën e Manastirit të Deçanit.
Në një postim në Facebook, ai ka shtuar se çështja e vendimit të Gjykatës Kushtetuese të vitit 2016 dhe vendosja e tij si kusht gjatë procesit të anëtarësimit të Kosovës në Këshillin e Evropës në vitin 2024 është sqaruar qartë në mbledhjen e Qeverisë dhe në konferencën për media të mbajtur në atë kohë.
“Ajo çka ka ngatërruar ministri Nenad Rashiq është pranimi i kërkesës së tij për vizitë të Patriarkut Porfirije, për Krishtlindjet ortodokse të vitit 2023, siç mund ta shihni në fotografinë më poshtë”, ka shkruar Manxhuka në Facebook.