Prokuroria Speciale e Republikës së Kosovës (PSRK) ka njoftuar të premten se ka ngritur një aktakuzë në Gjykatën Themelore në Prishtinë – Departamentin Special, kundër një personi nga komuniteti serb me inicialet Z.A, mbi dyshimet për krime lufte ndaj popullatës civile gjatë luftës së fundit në Kosovë.
Sipas njoftimit të Prokurorisë Speciale, ekziston dyshimi se gjatë periudhës së luftës në Kosovë, personi me inicialet Z.A. ka bashkëvepruar me pjesëtarë të policisë serbe të veshur me uniforma të tyre dhe të armatosur.
Ata dyshohet se kanë ndaluar dhe torturuar një qytetar të dëmtuar me inicialet B.M. në qendër të qytetit të Kamenicës, duke i shkaktuar lëndime të rënda trupore dhe traumat.
Gjithashtu, sipas njoftimit të PSRK-së, ata kanë kërcënuar me jetë për një orë e gjysmë.
Veprimet e tyre konsiderohen si shkelje e ligjeve vendore, zakoneve të luftës dhe Konventave Ndërkombëtare të Gjenevës dhe Protokolleve Shtesë.
“Prokuroria Speciale njofton se ekziston dyshimi i bazuar mirë se i pandehuri Z.A, gjatë periudhës së luftës në Kosovë, në bashkëkryerje me pjesëtarë tjerë të policisë serbe, i uniformuar me uniformë të policisë serbe dhe i armatosur, e kishte ndaluar në qendër të qytetit të Kamenicës të dëmtuarin B.M. duke e torturuar në mënyrë ç‘njerëzore, maltretuar dhe duke i shkaktuar lëndime të rënda trupore, traumë dhe pasoja në shëndet, si dhe duke e kanosur seriozisht për jetë për një orë e gjysmë, veprime këto të sanksionuara sipas ligjeve vendore, zakoneve të luftës dhe Konventave Ndërkombëtare të Gjenevës dhe Protokolleve Shtesë”, thuhet në njoftim.
Përveç kësaj, Z.A. bashkë me grupin e tij dyshohet se kanë marrë pjesë në dëbimin dhe shpërnguljen me dhunë të qytetarëve të Kamenicës dhe rrethinës së saj.
Ai akuzohet gjithashtu se ka marrë pjesë në plaçkitje të shtëpive dhe dëmtim të pronës së banorëve shqiptarë, duke i djegur ato. Po ashtu, akuzohet për keqtrajtimin e civilëve shqiptarë gjatë kësaj periudhe.
“Po ashtu, i pandehuri Z.A. në bashkëkryerje me pjesëtarë tjerë të policisë serbe dhe grupeve paramilitare, ka marrë pjesë në dëbimin dhe shpërnguljen me dhunë të qytetarëve të Kamenicës me rrethinë, pastaj kanë filluar të bëjnë plaçkitjen e shtëpive, e më pas me qëllim të dëmtimit të pronës së shqiptarëve ia kanë vënë zjarrin, po ashtu kanë marrë pjesë në keqtrajtimin e civilëve shqiptarë”, thuhet tutje në njoftim.
Z.A., i cili i përket nacionalitet serb, ishte arrestuar fillimisht më 7 mars, ndërsa më 8 mars atij iu vendos masa e paraburgimit prej një muaji nga Gjykata Themelore në Prishtinë.