Në selinë e Bashkimit Evropian (BE), ka nisur punimet Samiti i BE-së dhe Ballkanit Perëndimor, ku 27 krerë shtetesh dhe qeverish evropiane po diskutojnë mbi sfidat me të cilat përballen së bashku, veçanërisht në dritën e agresionit rus kundër Ukrainës.
Pavarësisht deklaratave optimiste për vendim për liberalizim vizash, konsiderohet se ka pak gjasa që kjo të ndodhë në realitet.
Nga Kosova, në këtë takim merr pjesë presidentja Vjosa Osmani, e cila ka thënë se s’ka pritje të mëdha.
Osmani para fillimit të Samitit ka thënë se shpreson që të arrihet një dakord për liberalizim të vizave për Kosovën, ndonëse nuk dëshiron që të rrisë pritjet.
“Unë sigurisht se shpresoj. Nuk dua të rrisë pritjet, pasi ky proces nuk është më në duar tona. Kosova ka plotësuar të gjitha kriteret sa i përket liberalizimit të vizave dhe atë qysh para 4 vjetësh, e po ashtu i është përgjigjur të gjitha shqetësimeve që kanë pasur shtetet anëtare. Është koha që shtetet anëtare të BE-së të përkrahin këtë, pasi është padrejtësi e madhe ndaj njerëzve të Kosovës”, ka thënë Osmani.
“Qindra miliona njerëz nga e gjithë bota, përfshirë nga Venezuela, kanë liri të lëvizjes. E njerëzit e Kosovës me më pak se 2 milionë banorë nuk e kanë këtë. Ne i kemi plotësuar të gjitha kriteret. Komisioni Evropian e ka konfirmuar këtë, Parlamenti Evropian e ka thënë këtë. Shtetet anëtare të BE-së duhet të dëgjojnë zërin e njerëzve të tyre që është reflektuar në Parlament Evropian”, shtoi ajo.
Sipas presidentes Osmani, Kosova ka vetëm rrugën euroatlantike dhe se do ta vazhdojë atë drejtim, ndryshe nga Serbia që po tenton të ecë në dy rrugë, atë të Moskës dhe të BE-së.