Ka filluar takimi bilateral BE-Kosovë, përkatësisht takimi i Shefit për Politikë të Jashtme të BE-së, Josep Borrell dhe kryeministrit Albin Kurti, raporton RTK.
Pas takimit me kryeministrin Kurti, Borell do të takohet me presidentin e Serbisë, Aleksandar Vuçiq. Në fund të takimeve dypalëshe kalohet në takimin trilateral: BE-Kosovë-Serbi.
Ndërkaq, përfaqësuesi i Lartë i Bashkimit Evropian për Politikë të Jashtme e Siguri, Josep Borrell, para takimit të kryeministrit të Kosovës, Albin Kurti e presidentit të Serbisë, Aleksandër Vuçiq në Bruksel, ka thënë se shpreson që pas këtij takimi të zbatohet Marrëveshja Bazë, për të cilën, Kosova e Serbia janë zotuar.
Në një konferencë për media, kryediplomati evropian tha se shpreson që sot të hidhen hapa përpara për zbatimin e kësaj marrëveshjeje.
“Zbatimi i kësaj marrëveshjeje duhet të fillojë, shpresoj që sot definitivisht të diskutojmë dhe të hedhim hapa përpara për zbatimin e kësaj marrëveshjeje. Ajo që është arritur duhet të zbatohet”, ka deklaruar Borrell.