Kryeministri Albin Kurti dhe ministri i Infrastrukturës, Liburn Aliu, mëngjesin e së hënës kanë marrë pjesë në nisjen e punimeve për projektin “Zgjerimi i Rrugës Nacionale M2” në rrugën Prishtinë – Mitrovicë.
Me këtë rast, Kurti ka shprehur bindjen se Qeveria e tij është më e përgatitur sesa në të kaluarën për këtë projekt, duke theksuar ndryshimet pozitive në përgatitje dhe planifikim.
Sipas tij, në të kaluarën ka pasur plane të dobëta, përgatitje të pakta e zvarritje të shumta.
“Në të kaluarën ka pasur plane të dobëta, e përgatitje të pakta. Me qeverinë tonë kemi shumë përgatitje, plane të hollësishme, prandaj punët janë të rregullta sipas procedurës. Nuk do të mungojë angazhimi ynë. Nga një rrugë e cila ishte me dy korsi, tash do të kemi rrugë nacionale me dy drejtime, secila me nga dy korsi”, ka deklaruar Kurti.
Nga ana tjetër, ministri Aliu ka theksuar se në projektin për zgjerimin e rrugës kanë pasur sfida të shumta dhe se përpjekjet janë konsoliduar për të adresuar problemet e shpronësimit.
“Mobilizimin e kemi bërë maksimal, shenjat janë të mira, do të përkushtohemi maksimalisht. Këtu është dashtë ta bëjmë auditimi, proces i rëndë me probleme të shumta”, ka shtuar Aliu.
Ndryshe, punimet në këtë rrugë kanë pësuar ndërprerje për shkak të vështirësive në procesin e shpronësimit në atë pjesë.