Gjykata Themelore në Prishtinë ka caktuar masën e paraburgimit prej një muaji ndaj prokurorit Beqë Shala, i cili dyshohet për veprën penale “Marrje e ryshfetit”.
Sipas njoftimit të Gjykatës, gjyqtari i procedurës paraprake ka vlerësuar se paraburgimi është masa më e përshtatshme në këtë rast, pasi ekziston rreziku që i pandehuri, nëse lihet i lirë, të ndikojë në prova apo dëshmitarë.
“Prishtinë, 28 Tetor 2025 – Gjykata Themelore në Prishtinë, Departamenti Special ka vendosur lidhur me kërkesën e Prokurorisë Speciale të Republikës së Kosovës, për caktimin e masës së paraburgimit në çështjen penale ndaj të pandehurit B.SH., për shkak të dyshimit të bazuar se ka kryer veprën penale Marrje e ryshfetit.
Gjyqtari i procedurës paraprake ka aprovuar kërkesën e Prokurorisë Speciale të Republikës të Kosovës për caktimin e masës së paraburgimit ndaj të pandehurit B.SH, ashtu që të njëjtit i caktohet masa e paraburgimit në kohëzgjatje prej 1 (një) muaji.
Pas mbajtjes së seancës dëgjimore, gjykata vlerësoj se caktimi i masës së paraburgimit në këtë çështje penale është masë adekuate sepse nëse i pandehuri lihet në liri, i njëjti mund të ndikojë në prova dhe në dëshmitarë, po ashtu gjykata vlerësoj se cdo masë tjetër do të ishte e pamajftueshme për zbatimin e suksesshëm të procedurës penale, pengimin e rrjedhës normale të kësaj procedure penale si dhe pengimin e përsëritjes së veprave penale.
Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë”, thuhet në njoftim.