Gjykata Themelore në Prizren, Departamenti i Krimeve të Rënda, ka caktuar masën e paraburgimit prej një muaji për të pandehurin F.B., i dyshuar për vrasjen e nënës së tij në fshatin Restelicë të Dragashit.
Masa e paraburgimit mund të zgjasë deri më 22 shkurt 2026.
Gjyqtarja e procedurës paraprake, Shpresa Emra, ka theksuar se caktimi i paraburgimit është i domosdoshëm për shkak të peshës së rëndë të veprës, mënyrës së kryerjes brenda ambientit familjar, vendosmërisë së të pandehurit dhe historisë së mëparshme të tij me viktimën T.B.
“Me rastin e caktimit të paraburgimit, Gjykata ka marrë parasysh peshën e rëndë të veprës penale, duke marrë parasysh mënyrën dhe rrethanat në të cilat dyshohen se është kryer vepra, brenda ambientit familjar, dhe duke marrë parasysh vendosmërinë e të pandehurit për të kryer veprën, me anë të ushtrimit të dhunës dhe ngulfatajes ndaj anëtarit të familjes, andaj në këtë fazë caktimi i paraburgimit është i domosdoshëm dhe i arsyeshëm. Gjithashtu duke marrë parasysh edhe karakteristikat personale të të pandehurit, i dënuar më herët për vepra të ngjashme ku palë e dëmtuar ka qenë pikërisht viktima T.B., si dhe me qëllim të mbarëvajtjes së procedurës penale, ndaj të pandehurit do të urdhërohet ekzaminimi psikiatrik, Gjykata ka ardhur në përfundim se caktim i paraburgimit është i domosdoshëm për të siguruar prezencën e tij në procedurën hetimore e cila është në fazën fillestare”.
Gjykata ka urdhëruar gjithashtu që F.B. të nënshtrohet ekzaminimit psikiatrik në QKUK, Instituti i Forenzikës Psikiatrike, brenda dy javësh nga dita e lëshimit të urdhrit, dhe raporti të dorëzohet tek Prokuroria Themelore në Prizren dhe gjyqtari i procedurës paraprake.
“Gjykata ka ardhur në përfundim se në rastin konkret caktimi i paraburgimit për të pandehurin është oportune dhe e nevojshme, për mbarëvajtjene procedurës hetimore. Gjithashtu Gjyqtarja e procedurës paraprake, me datë 22.01.2026, ka lëshuar URDHËR, për QKUK-në, Institutin e forenzikës psikiatrike të kryejë ekzaminim psikiatrik, në një kohë sa më të shpejtë që të jetë e mundur, por jo më gjatë se afati prej dy (2) javësh nga dita e lëshimit të urdhëresës. Dhe pas kryerjes së ekzaminimit, raporti dhe ekspertiza, ti dorëzohet Prokurorinë Themelore Prizren, dhe Gjyqtarit të procedurës paraprake”, thuhet në njoftim.
Kërkohet paraburgim ndaj të dyshuarit për vrasjen e nënës në Restelicë të Dragashit