Sot, pjesëtarë të dy njësive elite të Policisë, do të stacionohen para Qeverisë për të shprehur edhe një herë tjetër pakënaqësitë e tyre.
Nga ora 12:00, pjesëtarët e Njësisë Speciale Intervenuese (NjSI) dhe Sindikata e Policisë do të protestojnë para Qeverisë së Kosovës për shkak të pagave, shtesave të rrezikshmërisë, sigurimeve shëndetësore dhe kërkesave të tjera.
Por protesta e së shtunës, do të jetë ndryshe nga ajo e para, e mbajtur më shumë se 1 muaj më parë.
Kjo pasi Njësisë Speciale Intervenuese dhe Njësisë për Trajtimin e Mjeteve Eksplozive, siç ka marrë vesh televizionin Dukagjini, do t’i bashkohen edhe zyrtarë të njësive tjera, madje edhe efektiv me pozita udhëheqëse në këtë institucion.
Pjesëtarët e NJSI-së dhe asaj për trajtimin e Mjeteve Eksplozive, protestuan më 1 nëntor, duke kërkuar shtesa më të larta për rrezikshmëri e përfshirje në listën e ekspertëve.
Protesta e dytë e paralajmëruar, ishte pezulluar pas një takimi që ishte paralajmëruar me kryeministrin Kurti, por që i njëjti, pavarësisht se u zhvillua, duket se nuk dha efekt për t’i bindur zyrtarët policorë që të heqin dorë nga protesta.