Kuvendi i Kosovës nuk pati kuorum për ta votuar Projektligjin për Pagën Minimale, pro tij votuan 51 deputetë.
Nga 61 deputetë që i ka partia në pushtet Lëvizja Vetëvendosje, në seancë kishin marrë pjesë vetëm 51, ndërkaq një nga deputetët e tyre, Fatmir Humolli, nuk kishte votuar për ndryshimet e projektligjit për pagën minimale.
Ndërsa, deputetët e Partisë Demokratike të Kosovës(PDK) e të Aleancës për Ardhmërinë e Kosovës(AAK) e lëshuan sallën e Kuvendit.
E për shkak të mungesës së kuorumit, Kuvendi ndërpreu punën.
Për këtë mocion kishte përplasje në mes të deputetëve të opozitës dhe Adnan Rrustemit deputet i LVV-së.
Arben Gashi i LDK-së, ka thënë se Kuvendi nuk mund ta ndërrojë rendin e ditës pa e rrëzuar mocionin.
“Kuvendi ka një mocion që është delikat dhe i ndishëm, kuvendi nuk mund t’i vazhdojë punimet pa u marrë një vendim a kalon apo rrëzohet mocioni. VV duhet të ndajë mendjen cfarë po dëshiron. Më herët kemi pasur kompromis të vazhdojmë, sot kërkojmë të marr vendim a kalon apo jo mocioni, i propozuar nga deputeti Tahiri. Puna nuk mund të vazhdojë, nëse nuk rrëzohet mocioni”, ka thënë Gashi.
Atij iu përgjigj deputeti i VV-së Adnan Rrustemi, i cili tha se nuk ndërrohet rendi i ditës në mënyrën si po e kërkojnë deputetët e opozitës
“Meqenëse mocioni nuk kaloi, ne duhet të vazhdojmë me rendin e ditës. Rendi i ditës ndryshon vetëm me mocion procedural”, ka thënë ai.
Atij iu kundërpërgjigj Arben Gashi i LDK-së, duke i thënë se ai nuk e njeh rregulloren.
“Zotnija nuk e njeh hiç këtë rregullore. Këtu 7 seanca të pambyllura nuk janë dashur të ndodhin, por ka ndodhur se kemi pasur mirëkuptim, mirëkuptimin tash ky dëshiron ta bëjë normë, kjo nuk mund të bëhet normë”, tha ai.