Lojtari me origjinë shqiptare, Nuredin Rexhepi, i është përgjigjur pozitivisht ftesës për t’iu bashkuar Kombëtares së Kosovës. Rexhepi ka 17 vjet dhe është qendërmbrojtës i skuadrës VfB Stuttgart.
Prezantimin e Rexhepit e ka bërë presidenti i FFK-së, Agim Ademi, i cili ndodhet në Gjermani në një vizitë zyrtare.
“Sot dua të ndaj me të gjithë ju një tjetër lajm të mrekullueshëm, pasi talenti i ri, Nuredin Rexhepi, tashmë do të përfaqësojë Kombëtaren e Kosovës. Nuredini është një 17-vjeçar, shumë premtues, qendërmbrojtës i ekipit të VfB Stuttgart. Nuredini, i cili deri tash ka qenë pjesë e Kombëtares U17 të Gjermanisë, ka vendosur të luajë me gjithë zemër për Kombëtaren e Kosovës. Ky vendim i vlefshëm është marrë nga Nuredini dhe familja e tij, duke shprehur dëshirën e tyre të flaktë për ta përfaqësuar vendin e tyre”, ka shkruar Ademi.
Rexhepi ka realizuar 16 paraqitje me skuadrën e VfB Stuttgart, ku në shumicën prej tyre ka qenë startues, dhe në këto 16 paraqitje ka realizuar katër gola.
Tani mbetet që Nuredin Rexhepi t’i nënshtrohet procedurave të zakonshme dhe të pajiset me shtetësinë e Kosovës, në mënyrë që të ketë të drejtë për t’u paraqitur në fanellën e Kombëtares dardane.