Pas deklaratës publike të kryetarit të Komunës së Deçanit, Bashkim Ramosaj, i cili kishte thënë se për aq kohë sa ai do të jetë kryetar Komune, nuk do ta zbatojë vendimin e Gjykatës Kushtetuese për Manastirin e Deçanit, kanë reaguar organizatat joqeveritare të Kosovës dhe Serbisë.
Përmes një komunikate, këto organizata kanë shprehur shqetësimet e tyre, siç kanë thënë, për pasojat negative që mund t’i ketë deklarata e Ramosajt.
“Ne, të nënshkruarit, jemi të shqetësuar për pasojat negative të vazhdueshme të deklaratës së fundit të kryetarit të Komunës së Deçanit, Bashkim Ramosaj, i cili është zotuar se vendimi i Gjykatës Kushtetuese të Kosovës për pronësinë e tokës në Manastirin e Deçanit nuk do të zbatohet kurrë”, thuhet në njoftim.
Sipas OJQ-ve, vendimet e Gjykatës Kushtetuese duhet të respektohen sepse në të kundërtën, sipas tyre, ngjallin ndjenja pasigurie për qytetarët e Kosovës.
“Të gjitha vendimet e Gjykatës Kushtetuese të Kosovës duhet të respektohen. Kushtetuta ofron garancë të rëndësishme për të gjithë qytetarët e Kosovës, por garancitë e tilla kanë kuptim vetëm nëse vendimet e gjykatave zbatohen nga subjektet fizike dhe juridike në mbarë Kosovën”, thuhet në njoftim.
“Moszbatimi i aktgjykimeve ligjore çon vetëm në ndjenjë pasigurie për të gjithë qytetarët e Kosovës dhe shërben vetëm si dëmtues i besimit në sundimin e ligjit në Kosovë. Ne u bëjmë thirrje të gjithë atyre që mbajnë poste zyrtare publike që të përmbahen nga dhënia e deklaratave që shërbejnë vetëm për dëmtimin e besimit në sundimin e ligjit”, vijon njoftimi.
Nënshkruesit Aktiv të këtij njoftimi janë këto organizata:
Civic initiatives (Gradjanske inicijative) Center for Peace and Tolerance Democracy + (D+) Forum for Development and Multiethnic Collaboration (FDMC) Gorazdevac Media Group Jelena Lončar, Akademike, Universiteti i Beogradit Kosovo Laë Institute Neë Social Initiative (NSI) NGO Be Active 16, Preshevë Qendra mediale, Çagllavicë The Future, Bujanoc Voice of Roma, Ashkali and Egyptians (VoRAE) Vjollca Krasniqi, Akademike, Universiteti i Prishtinës YIHR Serbi YIHR Kosovë YUCOM Valon Arifi, Aktivist qytetar.
Ndryshe, Ambasadorët e QUINT-it, para disa jave kishin lëshuar një deklaratë të përbashkët lidhur me çështjen e pronës së Manastirit të Deçanit, duke i bërë thirrje Qeverisë së Kosovës që ta respektojë vendimin e vitit 2016 të Gjykatës Kushtetuese të Kosovës, që vërtetoi pronësinë e Manastirit të Deçanit mbi disa hektarë tokë.