Kryeministri i Hungarisë, Viktor Orban, ka njoftuar se vendi i tij ka marrë një përjashtim nga sanksionet amerikane ndaj energjisë ruse, pas takimit që zhvilloi në Shtëpinë e Bardhë me presidentin amerikan Donald Trump.
Orban, një aleat i hershëm politik i Trumpit, vizitoi Uashingtonin të premten për të kërkuar që Hungaria të lejohet të vazhdojë importet e naftës dhe gazit rus pa iu nënshtruar kufizimeve të vendosura ndaj Moskës për shkak të luftës në Ukrainë.
Në një konferencë për shtyp me mediat hungareze pas takimit, Orban deklaroi se Hungarisë i ishte dhënë “një përjashtim i plotë nga sanksionet” që prekin furnizimet me gaz përmes tubacionit TurkStream dhe me naftë nga Druzhba.
“Ne i kërkuam presidentit që të hiqte sanksionet. Ai ra dakord dhe vendosi që sanksionet të mos zbatohen për këto dy linja energjetike”, tha Orban.
Një zyrtar i Shtëpisë së Bardhë e konfirmoi më pas se Hungarisë i është dhënë një përjashtim njëvjeçar nga sanksionet që lidhen me përdorimin e energjisë ruse.
Ministri i Jashtëm hungarez, Péter Szijjártó, e përshkroi këtë vendim si një garanci për sigurinë energjetike të Hungarisë, duke e cilësuar atë “një fitore të madhe diplomatike”.
Orban shtoi gjithashtu se Hungaria planifikon të blejë karburant bërthamor nga kompania amerikane Westinghouse, si pjesë e përpjekjeve për të diversifikuar burimet e saj të energjisë.