Ministri i Punëve të Jashtme i Maqedonisë së Veriut, Bujar Osmani, në rrjetin e tij social në Facebook ka bërë të ditur se është takuar me përfaqësuesin e lartë të Bashkimit Evropian për Politikë të Jashtme dhe Siguri, Josep Borell në Santander.
Në fokus të këtij takimi produktiv dhe miqësor, sipas tij, ishte dosja e Bashkimit Evropian dhe e Maqedonisë së Veriut, me theks të veçantë “miratimin e ndryshimeve kushtetuese, si kusht për rrugën e pandërprerë të vendit drejt anëtarësimit të plotë në BE”.
Tutje, Osmani ka bërë të ditur se “me miratimin e ndryshimeve kushtetuese, Maqedonia e Veriut dëshmon se është e gatshme për anëtarësim në Bashkimin Europian dhe pret që negociatat e anëtarësimit nga Unioni të përfundojnë deri në fund të vitit 2030. Prandaj, as vendi e as Unioni nuk duhet të lejojnë ndonjë kthim mbrapa nga qëllimi”.
“Më shumë integrim përpara anëtarësimit në BE është në interesin tonë, por edhe në interesin e Unionit: Partner më i zhvilluar sot, aleat më i dobishëm nesër”, ka përfunduar Osmani.
Ndryshe, Osmani dje ka marrë pjesë në një akademi verore të organizuar nga përfaqësuesi i lartë i Bashkimit Evropian për Politikë të Jashtme dhe Siguri, Josep Borell, ku edhe është pyetur nga publiku në Santander për Kosovën, ku ndër të tjera, ai ka theksuar se Maqedonia e Veriut ka marrëdhënie të shkëlqyera bilaterale në mes të dy palëve.
Osmani nga Spanja theksoi se Kosova është vend i pavarur, e cila e ka kaluar testin e demokracisë.
Ndër të tjera, Osmani edhe një herë u bëri thirrje dy palëve, respektivisht Kosovës dhe Serbisë për marrëveshje bazuar në njohje reciproke.