Pas sulmeve raketore të Rusisë në qendër të Kievit, ka reaguar edhe presidentja e Kosovës, Vjosa Osmani, e cila ka kërkuar që Ukrainës t’i jepen mjete ushtarake për ta mbrojtur territorin e saj.
Përmes një postimi në Twitter, Osmani e ka quajtur Rusinë, “regjim gjenocidal”.
“Sulmi i regjimit gjenocidal rus ndaj njerëzve të pafajshëm dhe infrastrukturës civile rreth Ukrainës vazhdon. Ky është një krim lufte që duhet të ndiqet penalisht dhe autorët të sillen para drejtësisë. Ukrainës duhet t’i jepen mjetet e duhura ushtarake për të mbrojtur veten”, ka shkruar Osmani.
The Russian genocidal regime’s attack on innocent people & civilian infrastructure around #Ukraine continues.
This is a war crime that needs to be prosecuted & perpetrators brought to justice. Ukraine must be given adequate military means to defend itself.
🇽🇰 stands with 🇺🇦!
— Vjosa Osmani (@VjosaOsmaniPRKS) October 10, 2022
Tetë civilë janë vrarë dhe 24 janë plagosur si rezultat i sulmeve me raketa në Kiev këtë mëngjes, tha një ndihmës i ministrit të Brendshëm ukrainas.
Gjashtë makina u dogjën pas sulmit dhe mbi 15 automjete u dëmtuan, tha Rostyslav Smyrnov në një postim në Facebook.
Ai shtoi se 30 punonjës të shërbimit të urgjencës dhe gjashtë njësi reagimi ndoqën vendin e ngjarjes në rrethin Shevchenkivsky të Kievit.
Kreu i administratës ushtarake rajonale të kryeqytetit tha se sulmet ajrore ruse në Kiev nuk kanë mbaruar dhe njerëzit duhet të qëndrojnë të fshehur.
Pas sulmeve ruse në Kiev, presidenti i Ukrainës, Volodymyr Zelensky, ka deklaruar se do të mbajë një takim urgjent me G7 dhe se do të mbajë një fjalim.
Përmes një postimi në Twitter, ai ka thënë se ka folur me kancelarin gjerman, Olaf Scholz, i cili aktualisht mban presidencën e G7 dhe se Scholz kishte rënë dakord të mbante një takim urgjent të këtij grupi.