Presidentja e Republikës së Kosovës, Vjosa Osmani ka pritur në takim një grup të grave nga komunitetet rom, ashkali dhe egjiptian, të shoqëruara nga përfaqësuese të qendrës Concordia në Prizren.
Presidentja Osmani u informua rreth punës dhe projekteve të qendrës Concordia, e cila është e fokusuar në përkrahje të fëmijëve dhe grave nga komunitetet e margjinalizuara në Kosovë.
Siç njofton Zyra e Presidencës, kjo qendër punon kryesisht me pjesëtarë të komuniteteve rom, ashkali dhe egjiptian.
Presidentja u informua edhe me fushëveprimin e organizatës në përkrahje të fëmijëve dhe grave të këtyre komuniteteve përmes shërbimeve të ndryshme psiko-sociale dhe edukative.
Ndër tjera, Osmani ka ritheksuar përkushtimin e saj të palëkundur dhe të Presidencës së Republikës për mbështetjen e komuniteteve të margjinalizuara, me theks të veçantë fëmijët dhe gratë, duke përmendur rëndësinë e një shoqërie me mundësi të barabarta për të gjithë.