Presidentja e Kosovës, Vjosa Osmani, në konferencë të përbashkët për media me sekretarin e NATO-s, Jens Stoltenberg, ka kërkuar dënimin e agresionit të Serbisë më 29 maj në veri ndaj KFOR-it dhe atë të 24 shtatorit në Banjskë të Zveçanit ndaj Policisë së Kosovës.
Ajo ka thënë se sulmuesit e trupave të KFOR-it më 29 maj në veri janë po të njëjtit që organizuan sulmin ndaj Policisë së Kosovës në Banjskë, dhe nëse nuk dënohet agresioni i Serbisë do të përsëritet sërish me sulm ndaj Kosovës.
Tutje, Osmani ka theksuar e të dhënat e hetimeve zyrtare konfirmojnë se Serbia qëndron prapa këtij sulmi.
“Duhet të adresohet përgjegjësia e Serbisë më 29 maj dhe 24 shtator. Në vend se Serbia të ekstradojë terroristët, vazhdon t’i mbështesë ata. Zoti Stoltenberg, ju pata paralajmëruar në konferencë për media se nëse sulmuesit e trupave në maj që udhëhiqeshin nga bandat kriminale do përfundonin pa dënuar, do t’i inkurajonte të përsërisnin sulmet në shkallë më të madhe. Dhe kjo ndodhi. U përsërit. Janë po të njëjtit njerëz që sulmuan NATO-n që e sulmuan Policinë e Kosovës më 24 shtator, mosdënimi i agresionit është inkurajim për ta që ta sulmojnë Kosovën dhe rajonin. Roli i NATO-s në këtë drejtim është vendimtar, pasi Serbia mbetet kërcënim për paqen në rajonin tonë”, ka thënë Osmani.
E para e vendit ka thënë se anëtarësimi i Kosovës në NATO është qenësor, prandaj shtoi se ky institucion i sigurisë mund të llogarisë Kosovën si partnere të saj.
Osmani tutje ka shtuar se Kosova qëndron në një anë me NATO-n, ndërsa në anën tjetër qëndrojnë terroristët.
“Në të njëjtën kohë jemi falënderues edhe për ushtarët e NATO-s, edhe pse kjo paqe është cenuar dhe vazhdon që të cenohet nga Serbia. Të dhënat e hetimeve zyrtare konfirmojnë se Serbia qëndron prapa këtij sulmi. Në mënyrë që të mos lejohet përsëritja e një akti të tillë, Serbi duhet që të mbahet përgjegjëse. Serbia mbetet një kërcënim i vazhdueshëm për rajonin. Policia e Kosovës dhe NATO janë në njërën anë, terroristët janë në anën tjetër. Republika e Kosovës është partner ku gjithnjë mund të llogarisni”, ka vijuar Osmani.
Osmani ka theksuar se Policia e Kosovës është multietnike dhe është e gatshme të vazhdojë bashkëpunimin me KFOR-in, dhe se NATO-ja duhet të përcjellë një mesazh të qartë ndaj Beogradit: tërheqjen e trupave serbe nga afërsia e kufirit me Kosovën dhe mbylljen e qendrës humanitare serbo-ruse në Nish të Serbisë, që, sipas Osmanit, shërben si një qendër spiunazhi.