Presidentja e Kosovës, Vjosa Osmani, të mërkurën ka pritur në takim deputetin dhe zëdhënësin e Politikës së Mbrojtjes së Grupit Parlamentar të CDU/CSU në Bundestagun gjerman, Florian Hahn, të shoqëruar nga ambasadori i Gjermanisë në Kosovë, Jorn Rohde.
Siç ka njoftuar Zyra e Presidencës, Osmani dhe deputetin gjerman Hahn kanë diskutuar për situatën aktuale politike dhe të sigurisë në vend.
“Me këtë rast, Presidentja Osmani shprehu falënderimin dhe mirënjohjen e lartë për mbështetjen e vazhdueshme të shtetit mik të Gjermanisë në të gjitha proceset në të cilat ka kaluar vendi dhe populli ynë si dhe përkrahjen e madhe ne synimet tona drejtë integrimeve euroatlantike”, thuhet në njoftimin e Presidencës.
Po ashtu, Osmani ka theksuar nevojën e thellimit të bashkëpunimit me Gjermaninë në fushën e mbrojtjes dhe sigurisë, si dhe qëndrimin unik kundrejt tendencave destabilizuese ndaj Kosovës, por edhe në rajon e më gjerë.
Sipas Osmanit, Kosova është fuqimisht e përkushtuar në rrugën e integrimit euroatlantik me synim të qartë për anëtarësim në BE dhe në NATO.
Ndërkaq, në lidhje me anëtarësimin e Kosovës në Këshillin e Evropës, presidentja Osmani ka theksuar se anëtarësimi është në interes të të gjithë qytetarëve pa dallim dhe se kjo çështje ka të bëjë me të drejtat dhe liritë e njeriut.