Presidentja e Republikës së Kosovës, Vjosa Osmani, ka pritur në takim Komisionerin e Lartë të OSBE-së për Pakicat Kombëtare, Christophe Kamp.
Gjatë takimit, Presidentja Osmani theksoi se Kosova ka sistemin më të avancuar të mbrojtjes së të drejtave të njeriut në Evropë dhe mbetet e përkushtuar në garantimin e të drejtave të të gjithë qytetarëve, pa dallim etnie, feje apo përkatësie tjetër.
“Kosova ka sistemin më të avancuar të mbrojtjes së të drejtave të njeriut në Evropë dhe mbetet e përkushtuar në garantimin e të drejtave të të gjithë qytetarëve pa dallim”, deklaroi Osmani.
Ajo tha se përmes Këshillit Konsultativ për Komunitete, Presidenca po punon çdo ditë me përfaqësuesit e komuniteteve jo-shumicë për të adresuar shqetësimet e tyre dhe për të gjetur zgjidhje konkrete.
Osmani gjithashtu rikujtoi rëndësinë e Kushtetutës së Kosovës, e cila sipas saj bazohet mbi standardet më të avancuara demokratike dhe ofron mekanizma të fuqishëm për mbrojtjen e identitetit kulturor, gjuhësor dhe fetar të komuniteteve.
“Diversiteti është një vlerë e shoqërisë sonë dhe gjithëpërfshirja, respekti i ndërsjellë, barazia dhe liritë themelore mbeten prioritet i institucioneve tona”, shtoi ajo thuhet në njoftimin e presidencës.
Në takim u diskutua edhe për rëndësinë e vazhdimit të bashkëpunimit ndërmjet institucioneve të Kosovës dhe OSBE-së përmes programeve që synojnë forcimin e demokracisë, mbrojtjen e të drejtave të njeriut dhe sundimin e ligjit, fusha në të cilat Kosova po shënon progres të qëndrueshëm.