Presidentja e Kosovës, Vjosa Osmani ka udhëtuar drejt Tunizisë me ftesë të presidentit të Tunizisë, Kais Saied dhe Organizatës Ndërkombëtare të Frankofonisë dhe do ta përfaqësojë vendin në samitin e krerëve të shteteve të Organizatës Ndërkombëtare të Frankofonisë.
“Gjatë qëndrimit në Djerba, Presidentja Osmani do të mbajë një fjalim në një nga diskutimet e Frankofonisë, ndërsa do të zhvillojë edhe takime me liderë tjerë të shteteve anëtare të kësaj organizate”, thuhet në njoftimin e Presidencës.
Njoftohet se Samiti i Frankofonisë do të mbledhë krerët e shteteve anëtare dhe anëtarëve të asociuar të Organizatës Ndërkombëtare të Frankofonisë. Në takimin e tyre do të diskutohet mbi sfidat e përbashkëta politike dhe ekonomike, forcimin e bashkëpunimit frankofon, avancimin e të drejtave të njeriut, arsimit, kulturës dhe demokracisë.
Në njoftimin e Presidencës thuhet se Kosova është anëtare e asociuar e Organizatës së Frankofonisë nga viti 2018.